Со мечот во СЕХА лигата против екипата на Брест Мешков, Вардар ги започнува настапите во вториот дел од овогодинешната ракометна сезона. Иако се работи за значаен дуел на две екипи кои претендираат за место на Фајнал 4 турнирот, сепак за очекување е дека Вардар овој меч ќе го искористи за полека враќање во ритам на екипата, по завршување на СП во Катар. Секако, тоа не значи дека Вардар не оди на победа. Таа е значајна, не толку за задржување на високото второ место во лигата, колку за враќање на победничките патеки на македонската екипа, пред најважните мечеви во ЛШ. За потсетување, во првиот меч Брест убедливо го совлада Вардар на свој терен со 30-22.
Тренерот на Вардар, Раул Гонзалес е свесен за краткиот период за подготовка за мечот, но сепак среќен што ракометарите здрави се враќаат во екипата по настапите за своите репрезентации на шампионатот во Катар.
„Ова е нашиот прв меч по СП во Катар. Имавме неколку играчи кои настапуваа таму, па комплетни одржавме само неколку тренинзи пред мечот со Брест Мешков. Ние сме во добра позиција во моментов, на второто место, но нашата цел е да продолжиме со добри настапи се до осигурување на пласман на Ф4 турнирот. Брест Мешков е одлична екипа, која игра силна одбрана, и брзи противнапади. Ова ни е добро познато и од последниот наш дуел, па мора да имаме добар приистап во меччот за да забележиме успех. Овој меч е значаен за нас, особено пред идните настапи во Лигата на шампионите“.
И капитенот Филип Лазаров е свесен дека претстои тежок дуел, особено што ова е прв меч по СП, и дел од играчите се истоштени од тешките натпревари на шампионатот:
„Мора да дадеме се од себе, бидејќи тие (Брест) се во трка за пласман на Фајнал 4 турнирот. Исто така, треба да се забележи дека играат добро во ЛШ, па мора да бидеме внимателни на мечот. Ова ќе биде одличен тест за нас, пред продолжувањето на настапите во ЛШ“.
Мечот ќе се одигра во СЦ Јане Сандански, со почеток во 18:00, и со директен пренос на МРТ.
