Со дуелот против екипата на Лајпциг, кој на програмата е денес, сабота, екипата на ЖРК Вардар го започнува последниот циклус од 3 натпревари во втората, групна фаза од Лигата на шампионите. Циклус во кој буквално на секој меч, македонскиот првак ќе го има императивот на победата. Вардар мора да ги совлада и Лајпциг, и Крим и рускиот Динамо, за да се пласира во ¼-финалето на овогодинешната ЛШ.
Прв во низата противници е екипата на Лајпциг. Германките беа поуспешни од Вардар во првиот дуел во оваа групна фаза, кога славеа со 26-23, и во моментов се на 4-то место на табелата, последното место кое води во следната фаза натпреварувања. Да се потсетиме, на тој меч, Вардар одигра можеби најслабо сезонава и ова ќе биде вистинска шанса за реванш. Но за да дојде до 2 нови бода, Вардар ќе мора и тоа како да се помачи и да го подигне нивото на игра.
Два елементи од играта се најбитни за успех. Прво, играта во одбрана. Вардар во вториот дел од сезоната на голот ја има спектакуларната Амајдин Лејно, и вистинска штета е тоа да не го искористи. Лејно има по над 20 одбрани по натпревар (и против Крим и против Синара), а сепак екипата прима над 30 голови по натпревар. Тоа покажува колку е порозна одбраната на ЖРК Вардар и дека тука мора да има значително подобрување.
Второ е играта во транзиција. Лајпциг навистина не е толку квалитетна екипа, и прави доста грешки во играта во напад. Вардар мора тоа да го искористи и со брза транзиција да доаѓа до лесни голови. Транзицијата до сега (со исклучот на мечот со Крим), воопшто ја немаше во играта на Вардар. Како тоа воопшто да не е работено на тренинг. Се е оставено на луцидноста на Лекиќ, која реално има феноменален преглед на играта, но и таа заради немањето концепт на екипата, најчесто сама се обидува да ги реши нападите, и често греши.
На овој меч се надеваме дека конечно ќе видиме добра игра и од страна на Алтхаус. На сите познавачи на ракометот им е важна улогата на квалитетен, активен пивот во играта во напад, а до сега, практично како да игравме без играч на таа позиција. Нејзината игра е толку бледа, што дури и Радичевиќ на минатитот меч, иако на неприродна позиција за неа, одигра многу подобро во улога на пивот од Алтхаус.
Позитивна страна за ЖРК Вардар е враќањето на Хмирова во екипата. По операцијата на почетокот на сезоната, Хмирова конечно е рехабилитирана и ќе може да им помогне на своите соиграчки. Веројатно не може да очекуваме којзнае колкава минутажа, но добро е полека да се враќа, бидејќи ќе биде и тоа како потребна во евентуалното ¼ финале во кое ние сеуште силно веруваме.
На почетокот на сезонава сметавме дека Вардар ќе се прошета до фајнал 4 турнирот. Сега сме во ситуација да стравуваме дури и за пласман во нокаут фазата. Но не е се загубено. Денеска ќе видиме дали Вардар ја искористил паузата од 2 недели за подигнување на квалитетот или навивачите попусто се надеваат на повторување на ланскиот успех. Доколку видиме макар мали знаци на подобрување во играта, Вардар ќе има уште 2 меча да дополнително се подигне, и во полна форма влезе во ¼ финалниот дуел.
Мечот се игра во „Јане Сандански“, со почеток во 19.00 часот.
Среќно!
