Женската ракометна гордост на Македонија, екипата на Вардар, во недела во Копривница, го игра мечот од третото коло во овогодинешната Лига на Шампиони. Противник е добро познатата екипа на Подравка.
Подравка направи вистинско изненадување во квалификациите за ЛШ, откако на турнирот во Србија ја совлада екипата на Митјеланд, со што покажа дека и покрај тоа што ја загубија шампионската титула во Хрватска, имаат квалитетен тим.
Во првите две кола, Подравка забележа два пораза, на гостувањето во Германија против Турингер и на домашен терен против екипата на Будуќност, па дуелот со екипата на Вардар им е веројатно последна шанса да останат во игра за место кое води во наредната фаза на натпреварувања. Клучен играч во екипата е искусната Миранда Татари (15 гола во првите два натпревари), и таа го држи клучот на успехот во играта на хрватската екипа.
Сепак, на сите во светот на ракометот им е јасно дека Вардар е апсолутен фаворит на овој меч. И во дуели со многу посилни екипи од Подравка, резултатот зависи исклучиво од играта на нашиот шампион. Во првите две кола Вардар се мачеше, и очекуваме на дуелот од третото коло да ги видиме ракометарките во вистинско светло. Очекуваме многу подобра игра во нападот, и поцврста игра во одбраната, бидејќи практично невозможно е да се очекува Ина Суслина да има повторно над 20 одбрани. Бековската линија Пенезиќ, Лекиќ и Лазовиќ од меч на меч функционира се подобро. Она што го очекуваме е конечно и крилата Радичевиќ, Зебиќ и Дембеле да одиграат онака како што умеат. Дополнително, во отсуство на повредената Бегоња Фернандез, престојниов меч ќе биде одлична можност за Ања Алтхаус да покаже дека управата направила прав потег со нејзиното ангажирање.
Македонската јавност очекува сигурна игра и победа. Ние сме убедени дека нашите ракометарки тоа го можат.
Натпреварот се игра во недела, со почеток во 17:00 часот, со директен пренос на Алфа ТВ.
