Македонскиот шампион Металург денес го пречекува ППД Загреб во последниот натпревар од ЛШ, натпревар во кој и двете екипи ќе играат за престиж бидејќи не можат да ја променат својата позицијата на табелата. Реконструираниот тим на Металург кој одамна ги загуби шансите за пласман понатаму, со добро познатиот подмладен состав ќе се обиде да ја израдува својата публика и на достоен начин да се збогува со настапите во ЛШ.
По три години пласман во нокаут фазата, тимот на Лино Червар годинава нема да биде дел од европската елита во топ 16 фазата. Финансиската криза која го растури клубот е причината поради која во пресрет на последниот натпревар, македонскиот шампион брои една победа, едно реми и седум порази во групата.
Младите надежи на Металург ќе имаат шанса повторно да ги покажат своите несомнени квалитети, кои натпревар во натпревар се повеќе доаѓаат до израз. Повторно во овој натпревар главна улога ќе играат младите Талески, Нелоски и Манасков, потпомогнати од искусните Митревски, Ојлески и Стојановиќ ќе пробаат да ја израдуваат македонската публика која нестрпливо чека да се израдува на уште една победа.
Составот за денешниот натпревар: Бувиниќ, Џукиќ, Костески, Крстевски, Куковски, браќата Маџовски, Манасков, Мисовски, Митревски, Нелоски, Ојлески, Пешевски, Стојановиќ, Талески и Велковски.
Натпреварот се игра од 19:00 часот во СЦ Борис Трајковски, со директен пренос на Алфа ТВ.
