РК Пелистер како домаќин ја пречекува екипата на РК Работнички, која пак во секој натпревар игра се подобро и подобро. По несреќниот пораз од екипата на РК Вардар Јуниор на гостински терен, ракометарите на РК Пелистер овој пат на домашен терен ќе се обидат да стигнат до нова победа и освојување на нови 3 бода. Натпреварот е закажан за денес со почеток во 18 часот.
Околу очекувањата и прогнозите за овој натпревар, тимот на МакРакомет поразговара со пивотот на РК Пелистер, Петар Топиќ.
„Моите мисли и очекувања за овој натпревар се насочени само кон едно, а тоа е победа. Ние играме на домашен терен пред нашата верна публика, па токму затоа мораме да покажеме дека никој нема право да се надева да ги земе бодовите од тука. Ова ќе биде еден тежок натпревар, ние максимално го почитуваме противникот, екипата на Работнички, но сум уверен дека со поддршка од нашите навивачи и со максимален ангажман, ќе дојдеме до нова победа и освојување на трите значајни бода.“ – изјави Топиќ.
Во ова 4-то коло ќе се сретнат и двете екипи на Металург, РК Металург и РК Металург 2. Значајно младиот и неискусен тим на Металург 2 ќе се обиде да му се спротистави на се подобриот и поискусен Металург. Овој натпревар е закажан за денес, со почеток во 18 часот. Натпреварот ќе се одигра во спортската сала во Автокоманда. Влезот за сите посетители е слободен.
Директни преноси и од двата натпревари ќе има на официјалната страна на Ракометната Федерација на Македонија, во делот live streaming.
