Трета година по ред ракометарката на ЖРК Вардар, Андреа Лекиќ ќе организира камп за млади ракометарки и ракометари на возраст од 11 до 17 години. После двете вистински летни фантазии во Србија и Врњачка Бања, Лекиќ решава третиот камп да се оддржи во Македонија, поточно во Охрид во периодот од 20-ти до 26-ти Јуни, бидејќи ракометот е спорт број еден кај нас. Учесниците ќе бидат сместени во хотелот „Дипломат“, а комплетните активности ќе се одвиваат во 2 сесии дневно, претпладне и попладне во салата „Билјанини Извори“, која се наоѓа во непосредна близина на хотелот.
Уште од првото издание кампот има меѓународен карактер, со оглед на тоа дека во 2013 година имаше учесници од 7 држави, а минатата година таа бројка стигна до 11 држави. Досега за учество на годинешниот камп има пријавено млади ракометари од 9 европски земји.
На денешната конференција за новинари, Андреа Лекиќ повтори колку е среќна поради можноста за средба со идните ракометни надежи во Охрид:
 |
„Неизмерно задоволство ми е да гледам како децата го впиваат се она што им се објаснува и покажува. Нивната радост, креативност, волја и енергија се нешто најубаво на светот. Да се видат нивните солзи на крајот од кампот кога се тажни што сè се завршува, е неверојатно чувство. Додека е така, ќе постои кампот, од година во година“ |
|---|
Најдобрата светска ракометарка за 2013 година, дел од својот одмор од професионалните обврски во Вардар веќе традиционално го користи за да пренесе дел од своето знаење на децата, но и во кампот истовремено да се креира работна и забавна атмосфера која ќе се памти цел живот.
За ракометните тренинзи, како и досега ќе бидат задолжени Горан Цмиљаниќ, Весна Бојковиќ и Радан Ровчанин, а нивни асистенти ќе бидат Ерна Кожар-Топалович (Словенија), Александра Кузмановска (Македонија) и Кристоф Сахли (Швајцарија). Марија Лојаница на секогаш поинаков и интересен начин ќе им ги приближи на учесниците кондициските тренинзи, додека за работа со голманите е задолжена Бранка Јовановиќ. Спортскиот психолог Бојана Јеличиќ помеѓу другото во разговор со учесниците ќе им помогне во сознанието дека е најважно да се истрае во преминувањето преку пречките и проблемите, додека за забавниот и релаксирачкиот дел од програмата е задолжена аниматорката Славица Кашериќ.
Цената на ракометниот камп е 250 евра за учесниците од Македонија.
Повеќе информации ТУКА
