Во исчекување на скратениот список, од Германија доаѓа би рекле непосакувана вест. Македонскиот репрезентативец, Филип Миркуловски нема да биде во составот на македонската репрезентација на претстојното Светско првенство во Германија и Данска.
Иако и претходно најави дека планира да стави конечен крај на репрезентативната кариера, средиот бек денеска и официјално потврди дека нема да игра на СП во јануари.
„Многу ми е жал. Но, тоа е тоа. Влечам многу повреди и не сум подготвен да одиграм на ниво на кое што треба да сум и на кое што сите очекуваат да сум. Им посакувам на момците многу среќа и пласман во Олимписки квалификации” – изјави Миркуловски за g-sport.mk.
Македонската репрезентација првиот собир во рамките на подготовките за Мундијалот ќе го има во понеделник во 16:30 часот. Со кои ракометари ќе работи Гонзалес останува да биде познато или во текот на утрешниот ден или најдоцна до понеделник.
