После двата натпревари со Словенија, кои завршија со реми, селекторот на македонската репрезентација, Ивица Обрван изјави дека е задоволен од овие два контролни натпревари.
„Овие два натпревара ги гледам како успешни контроли со силен противник. Испробавме неколку корисни комбинации со повеќе ротации. Така на пример Кирил Лазаров на првиот натпревар играше само едно полувреме додека во второто шутираше само пенали. На првата средба бранеше Дупјачанец, на втората Митревски доби шанса. Шанса добија сите, и младите можеа да играат, Кузмановски и на двата натпревара одигра добро. Иако ова беа само тестови, задоволен сум од ефектот и од резултатите“ – изјави Обрван.
Конечниот список на патници за Полска, Обрван ќе го објави по вториот дуел со Црна Гора.
„Што се однесува до конечниот список, тоа ќе биде одлука која ќе ја донесам по вториот натпревар со Ц. Гора. Дотогаш сакам да ги имам сите овие играчи на располагање, затоа што се случуваат непредвидливи ситуации и не би сакал некој од кого би можеле да зависиме да пропушта тренинг. Овде ете имавме ситни проблеми. Георгиевски имаше стомачен проблем, непосредно пред мечот. Лазаров мораше на клупа поради истегнување на препони, а Мојсоски доби силен удар во финишот на натпреварот. Се надевам дека ова ќе бидат само ситни проблеми кои ќе ги надминат за овие два дена“ -заврши Ивица Обрван.
