Со одигрувањето на натпреварите од 14-тото коло од ВИП машката Супер лига заврши првата полусезона од нашето најсилно натпреварување. Оваа година, за разлика од изминатите можеме да кажеме дека имаме доста поквалитетни екипи, а со тоа и натпревари. Иако во изминатите неколку години бевме навикнати да гледаме само 2 квалитетни екипи во нашето натпреварување Металург и Вардар и живеевме за дерби натпреварите помеѓу овие две екипи, оваа година е сосема поинаку. Во овогодинешното издание на Супер лигата се натпреваруваат 10 тима: РК Металург, РК Охрид, РК Прилеп, новиот и засилен тим на Работнички, дебитантот Вардар Јуниор, РК Тинекс Пролет, РК Радовиш, РК Пелистер, ГРК Борец, како и најмладата екипа која е составена од ракометари до 18 години – РК Металург 2. Тука се и екипите на РК Вардар и РК Макс Струмица кои пак заради обврските во Лигата на шампионите, односно Сеха лигата ќе се приклучат во завршницата, во разигрувањето за титулата.
Во почетното прво коло од ВИП машката Супер лига се сретнаа новиот и целосно реконструиран тим на Работнички и изненадувањето – екипата на РК Охрид која оваа година има тим за респект и моментално по одиграните 14 кола се наоѓа на делба на второто место заедно со екипата на РК Прилеп и со тоа е сериозен кандидат во завршниот турнир. Покрај одличните партии кои ги пружи во текот на овие 14 кола, овој состав сезоната ја започна со пораз. Првиот пораз и го нанесе екипата на Работнички која пак влезе тотално мотивирано и со јаки амбиции во ова натпреварување. По почетните 2 порази, ракометарите на РК Охрид се „разбудија“, па од тој момент редеа само победи и со тоа заслужено се наоѓаат на третото место на табелата со идентични бодови со екипата на РК Прилеп, но со помала гол разлика. Како најефикасни во овој состав на РК Охрид се истакнуваат Дарко Павловиќ, Горан Печенковски кој беше избран за играч на колото, одличниот голман Колев, како и засилувањето Вражалица.
Тимот на МакРакомет, поразговара со еден од предводниците на играта на РК Охрид, Горан Печенковски, кој накратко ги искажа своите впечатоци по завршувањето на оваа полусезона.
Печенковски: „Ние како тим сме задоволни од постигнатиот успех во првата полусезона. Целта на клубот беше пласман во завршницата, во плејофот. Што се однесува до пролетниот дел, амбициите се да направиме што подобар успех и да се прикажеме во добро светло. Она што го посакуваме е да бидеме добро пласирани, а со тоа и да обезбедиме место во Европските натпреварувања за наредната сезона.“
Топ 3 натпревари на РК Охрид:
- РК Охрид 24:20 РК Работнички
- РК Радовиш 19:29 РК Охрид
- РК Металург 36:25 РК Охрид
