Македонија пред вториот чекор, кон остварување на главната цел!

Ниту постои, а во блиска иднина веројатно нема ни да постои македонски национален тим кој на Eвропско првенство (ќе) го испраќаме со очекувања за медал. Освен македонската ракометна репрезентација. Реално или не, македонската јавнoст од своите спортски миленици секој јануари очекува најголеми дострели.

Така е и овој пат. На 10 дена до почетокот на Eвропското првенство, полека расте атмосферата меѓу македонските фанови, но и меѓу репрезентативците, стручниот штаб и раководството на репрезентацијата.

Сепак, кои се реалните цели на овој шампионат. Покрај спортскиот мотив „да се оди на победа на секој меч“ треба да се гледа големата цел – пласман на Олимписките игри во Токио 2020.

А до таму, патот одамна е однапред зацртан:

• Чекор 1: Пласман на ЕП 2018 во Хрватска

• Чекор 2: Пласман на едно од првите 3 места во групата и втора фаза (за да се има полесен противник во баражот за СП 2019

• Чекор 3: Пласман на СП 2019

• Чекор 4: Пласман во 1/4 финалето на СП и со тоа пласман за квалификациите на ОИ

• Чекор 5: Пласман на ОИ Токио 2020

Значи нашата репрезентација е пред реализација на вториот чекор. А на тој пат ни стојат репрезентациите на Словенија, Германија и Црна Гора. Секоја овие три репрезентации си има свои квалитети (Германија и Словенија се апсолутни фаворити), но и Македонија си има свои планови, свои силни страни кои ќе мора да ги искористиме.

Во подготвителниот период до сега, селекторот Раул Гонзалес се реши да нема контролни мечеви. Всушност, единствените контролни натпревари Македонија ќе ги одигра на 4-ти и 5-ти Јануари против селекциите на Саудиска Арабија и Србија, каде селекторот ќе може да провери дали добро се работело на досегашните подготовки.

На ова првенство од Македонија се очекува побрза и поразновидна игра во нападот (поубава за око), поцврста одбрана, но најбитно, се очекуваат резултати. Она што никој нема да сака да го слушне на крајот од шампионатот е „Македонија покажа ново лице, но немаше среќа“. Оваа репрезентација треба да покаже резултат!