Едни од најдобрите македонски ракометари на сите времиња и легендите на РК Металург, Филип Миркуловски и Наумче Мојсовски на денешниот натпревар против Чешка, во рамките од баражот за пласман на СП ќе им биде последен настап во дресот на макeдонската репрезентација.
Миркуловски на својот Фејсбук профил вчера го потврди тоа со еден емотивен статус, со кој им се заблагодари на сите што го подржуваа него и репрезентацијата во изминатите 15 години.
„Драги мои фанови, почитувачи на македонскиот ракомет, би сакал со сите Вас да споделам дека во среда на 15 јуни го играм последниот натпревар за мојата земја. Изминативе 15 години кои ги посветив на македонскиот ракомет беа незаменливо искуство и гордост со кои ги бранев боите на мојата земја со секоја капка пот, со секој атом енергија, примен удар, шут, пораз, победа, радост, со многу љубов и заложба. Воедно огромна благодарност за сета подршка и љубов, пред се од моето семејство, како и за извонредната соработка со сите гарнитури на управата на РФМ. Се надевам дема ќе ме подржите во мојата одлука и дека во среда заедно ќе го проследиме мојот последен натпревар за кој ќе се заложам по добро да го запаметиме :). Желба ми е на генерациите што доаѓаат да им оставам простор да покажат и допринесат за македонскиот ракомет за кој се надевам јас успеав да бидам добар пример. Со срце на терен! За Македонија!“ – објави Филип Миркуловски на својот фејсбук профил.
Истотака Наумче Мојсовски, кој најави заминување од македонската репрезентација уште по квалификациите за ОИ во Гданск, посакува на денешниот проштален натпревар да го остават срцето на терен и да обезбедат пласман на СП во Франција.
„Ова секако ќе биде најемоционалниот натпревар за мене, ај да не кажам најтешкиот. Имавме лоша партија со Чешка, лошо се совпаднаа работите, не ни тргна како што треба и знаеме на крај како заврши. Искрено се надевам дека овој натпревар нема да оди така. Пред домашната публика немаме одиграно толку лош натпревар и нема ни да одиграме. Посакувам на овој мој последен натпревар за македонската репрезентација да одиграме максимално и да славиме со над шест гола разлика“ – изјави Наумче Мојсовски.
Денешниот натпревар ќе се одигра во СЦ „Борис Трајковски“ од 20:00 часот.
