Викендов се одиграа натпреварите од 16-тото коло од ВИП машката Супер лига. Иако се наближува крајот на првата фаза, во ова 16-то коло следевме 5 возбудливи натпревари во кои фаворитите ја оправдаа својата улога и сосема заслужено дојдоа до нови победи. Најнапред, во петокот во Автокоманда се сретнаа двете скопски екипи, РК Металург 2 и РК Вардар Јуниор, а на оваа средба Вардар Јуниор полесно и од очекуваното успеа да слави со високи 17:40. Ден подоцна, следуваа дуели помеѓу екипите на ГРК Борец и РК Металург во Велес, РК Пелистер и РК Радовиш, како и РК Прилеп и РК Охрид. Денес, ова 16-то коло го затвори одличниот и до крај неизвесниот натпревар помеѓу екипите на РК Тинекс Пролет и РК Работнички.
Во продолжение следува детален преглед на секој натпревар поединечно од ова 16-то коло:
1) РК Металург 2 – РК Вардар Јуниор 17:40 (5:20)
– Улогата на фаворит на овој натпревар помеѓу овие две екипи ја имаше РК Вардар Јуниор и истата ја оправда совладувајќи го противникот со високи 23 голови разлика – 17:40. Вардар Јуниор полесно и од очекуваното успеа да забележи победа. Резултатот го отвори домашната екипа (1:0), а потоа следуваа неколку минути на изедначена игра и борба (1:1, 2:2, 3:3.) Од овој момент, стартуваше одличната серија на Вардар Јуниор од 6:0 за сигурно водство од 3:9. Во момент кога сите очекуваа резултатски да се врати Металург 2, се случи токму спротивното, расположената екипа на Вардар Јуниор повторно со серија овој пат од дури 9 голови успеа на некој начин да го реши победникот на овој дуел уште во првите 30 минути. По првите 30 минути, резултатот на семафорот беше 5:20. Второто полувреме беше само формалност, добрата игра на вардарци продолжи и со тоа се зголемуваше водството од минута во минута. Крајниот резултат на оваа средба е 17:40. Најефикасни на овој натпревар беа Димитриоски со 7 голови од екипата на Металург 2 и Поповски со 10 голови од Вардар Јуниор. Веќе во следното коло РК Металург 2 му гостува на Пелистер, а Вардар Јуниор ќе се сретне со екипата на Работнички.
2)ГРК Борец – РК Металург 24:29 (11:16)
– Во Велес, во спортската сала ,,Гемиџии“ се сретнаа ГРК Борец и РК Металург. Иако исходот од овој натпревар беше однапред познат, сепак екипата на Борец го намачи тимот од Автокоманда. Во одлична атмосфера започна натпреварот помеѓу овие два тима, а резултатот прв го отвори домаќинот Борец. По стартните 4 изедначувања на резултатот (1:1,2:2,3:3,4:4), прва серија од 2 голови направи Металург за 4:6. При резултат 6:9, следуваше еден мал период кој тотално му припадна на Металург благодарение на добрата одбрана и успешната реализација во нападот. Со трите голови во серија на Марко Бувиниќ, екипата на Металург дојде до највисокото водство од 6 голови разлика. Првите 30 минути му припаднаа на тимот од Автокоманда и заслужено на одмор заминаа и двете екипи при резултат 11:16. Веќе во второто полувреме следуваше одлична игра на Борец, која го изненади Металург иако тој го одржуваше своето водство. Од 45-тата минута до 55-тата минута следевме една сосема поинаква екипа на Борец, со одлична игра во одбраната и нападот и одличните одбрани на голманот Лазаровски, домаќинот успеа да се доближи на -3 (19:22). Ракометарите на Металург се соземаа и во самиот финиш на натпреварот успеаа да ги вратат оние 6 голови предност и заслужено дојдоа до својата 16-та победа сезонава. Најефикасни на овој натпревар беа Ивица Лазаровски со 6 голови од ГРК Борец, Палевски со 5, како и Бувиниќ и Пешевски со по 4 голови од екипата на Металург. Во 17-тото коло кое се игра следниот викенд ГРК Борец ќе се сретне со РК Радовиш, а РК Металург на домашен терен ја пречекува екипата на РК Прилеп.
3) РК Прилеп – РК Охрид 22:23 (15:11)
– Во една прекрасна атмосфера, во сала исполнета до последното место започна натпреварот помеѓу екипите на Прилеп и Охрид кој беше прогласен за натпревар на колото. Иако и двете екипи веќе обезбедија настап во плејофот и разигрувањето за титула,сепак победникот од овој дуел го задржи второто место на табелата веднаш зад Металург. Во првите 30 минути од овој натпревар видовме одлична игра прикажана и од двете екипи. Иако, гостинската екипа дојде прва во водство од +4, 6:10, домаќините не дозволија водството долго да трае, па со одлична игра дојдоа до изедначување 10:10. Од овој момент, па се до крајот на полувремето доминираше екипата на Прилеп која направи тотален пресврт и успеа на одмор да замине со предност од 4 голови, 15:11. На стартот од преостанатите 30 минути, прилепчани додадоа уште 2 гола за највисока предност од 6 голови, 17:11. Како изминуваа минутите, екипата на Охрид полека но сигурно се враќаше во натпреварот и некаде пред самиот финиш на натпреварот го изедначи резултатот на 21:21, а потоа и постигна завршни 2 гола, со што дојде до нова победа. На овој одличен натпревар најдобри поединци беа Јован Талевски со 6 голови од РК Прилеп и Хогас Малик со 9 голови од РК Охрид. Во наредното коло РК Прилеп му гостува на Металург во Скопје, а РК Охрид ќе се сретне со РК Тинекс Пролет.
4) РК Пелистер – РК Радовиш 33:25 (15:10)
– Ракометна Битола викендов беше сведок на уште еден одличен натпревар на екипата на РК Пелистер, која успеа високо да ја совлада екипата на РК Радовиш. РК Пелистер сигурно го започна овој натпревар и во текот на првите 30 минути имаше константно водство, при што не му дозволи на противникот резултатски да се доближи. Второто полувреме, битолчани го започнаа со водство од 5 голови разлика и тоа водство го одржуваа, се до моментот кога ја искористија лошата игра на ракометарите на Радовиш и успеаа да дојдат до +9, 27:18. Иако во овој дел од натпреварот веќе се знаеше победникот, до крајот ништо не се промени. Домаќинот заслужено оствари победа и дојде до нови 3 бода. Најпрецизни на овој натпревар беа капитенот на екипата на Пелистер, Стефан Дрогришки кој постигна 9 голови и Илиев Ивица од РК Радовиш кој постигна 10 голови. Во наредното 17-то коло Пелистер го пречекува Металург 2, а Радовиш ќе се сретне со ГРК Борец.
5) РК Тинекс Пролет – РК Работнички 22:23 (10:11)
– Екипата на Тинекс Пролет на домашен терен беше минимално поразена од фаворитот Работнички во еден крајно неизвесен натпревар. Во првото полувреме, подобар противник беше гостинот кој прв дојде во водство од +5, но само за кратко затоа што домаќинот брзо се врати и со -1, (10:11) замина на одмор. Во второто полувреме Пролет прикажа одлична игра, а за тоа сведочи изедначувањето на резултатот во 44-тата минута, по водството на Работнички од неколку голови. Од тој момент, па се до самиот крај следуваше вистинска драма. При резултат 22:22, на 30 секунди до крајот, Илиќ успеа да постигне гол за Работнички и да поведе 22:23, а потоа и спречи сигурен напад на Тинекс Пролет со кој можеше да дојде до нерешен резултат. Одличен на овој натпревар денес беше голманот Ѓоргески од Работнички кој имаше 14 одбрани, како и Илиќ кој постигна 12 голови и беше еден од најзаслужните за оваа минимална победа на својата екипа. Од екипата на Тинекс Пролет најдобри поединци беа Андоновски кој постигна 8 голови и голманот Кимевски кој имаше 12 одбрани. Наредниот викенд Тинекс Пролет ќе се сретне со РК Охрид, а Работнички ја пречекува екипата на РК Вардар Јуниор.
