Екипата на Металург е првиот финалист во Купот на Македонија. Ракометарите на Червар потешко од очекуваното успеаа да слават минимална победа 30:28 (16.:13) и со тоа да обезбедат место во финалето. Иако Металург важеше за апсолутен фаворит, сепак момците на Манасков достојно му пружија отпор на противникот. Првите 25 минути гледавме вистинска борба на теренот, многу изедначувања на семафорот и одлична игра, а Металург успеа да дојде до +3 највисоко водство во првиот период и успеа да го задржи до крајот на првите 30 минути, 16:13.
Вториот решавачки период му припадна на Металург, но во самиот финиш дојде до мало опуштање на ракометарите на Червар, а тоа вардарци успешно го искористија и резултатски се приближија на -2, 29:27. На минута до крајот, Талески постигна гол за +3 и за сигурна победа на Металург. Во самиот финиш, вардарци постигнаа гол за да го ублажат поразот.
Најефикасни на овој натпревар беа Талески со 8 и Костески со 6 голови од РК Металург, како и Поповски со 6 и Тренчевски со 5 голови од екипата на Вардар Јуниор.
Екипата на Металург ќе игра во големото финале, а противник ќе му биде подобриот од натпреварот помеѓу РК Охрид и РК Вардар.
фото: gol.mk
