По само два дена по одличната игра и убедливиот триумф над силниот Веспрем, ракометарите на Вардар попладнево од 17:45 часот во СЦ „Јане Сандански“ ги чека ново дерби во СЕХА-лигата, против добро познатиот ривал, екипата на ППД Загреб.
Екипи кои во СЕХА лигата имаат одиграно 14 натпревар еден против друг до сега, каде Вардар има 7 победи, 1 реми и 6 порази. Доволно говори за неизвесноста и квалитетот на ова дерби.
Загрепчани доаѓаат во Скопје без Домагој Павловиќ и Лука Шебетиќ, додека кај Вардар поради повреда нема да биде во составот Илија Абутовиќ. „Коцкестите“ на чело со искусниот Веселин Вујовиќ, како и нашиот репрезентативец Велко Маркоски на својот прв натпревар очекувано ја победија екипата на Нексе со 28:22. Денес ќе пробаат да се спротистават на расположенот Вардар, кој со нетрпение чека да одигра уште еден добар натпревар како против екипата на Веспрем.
Во пресрет на натпреварот, по победата на вардарци над Веспрем, Вујовиќ изјави:
„Победата на Вардар не ме изненади, но ме изненади разликата со која победија. Јас очекував доста тесен натпревар, но на крајот, Вардар славеше со седум голови разлика. Тоа не е изненадување само за мене, туку за целиот ракометен аудиториум и сите познавачи на овој спорт. Вардар е сигурно фаворит, одиграа доста воздржано, но потоа го надиграа Веспрем, па можеби со таа победа покажаа дека се силен тим во Европа“
Додека, капитенот Стојанче Стоилов очекува диманичен и борбен ракомет, во кој дотолку одиграат на истото ниво како против Веспрем, може да се очекува позитивен резултат:
„Загреб е една од екипите што најдобро ја познаваме, заедно сме во СЕХА-лигата од самото формирање. Имаат тренер што одлично не познава, но и ние него. Натпреварот ќе биде динамичен и борбен. ППД Загреб е квалитетна и незгодна екипа, тоа го потврдија и минатата сезона во СЕХА-лигата и во Лигата на шампионите. Ако ја повториме играта против Веспрем, можеме да очекуваме позитивен резултат“
